Tuesday, January 8, 2013

သာမန် ထိုင်နေခြင်း


သေချင်တဲ့ ကျား တောပြောင်း.. ၊ ထိုင်နေလျှင်ကောင်းသား ထသွားမှ ကျိုးမှန်းသိ 
ဒီစကားပုံတွေကို ဗမာလူမျိုးတွေ နေ့စဉ် အသုံးပြုနေတဲ့ စကားလုံးတွေထဲမှာ ပါလေ့ရှိတဲ့ (၀ါ) အသုံးများတဲ့ စကားစု တစ်ခုပါ..။သေချင်တဲ့ ကျားတောပြောင်းဆိုတာကတော့ တနေရာကနေ တနေရာကို ကူးပြောင်းတဲ့ အချိန် မှာ အဆင်မပြေတာတွေ..စိတ်ပျက်စရာတွေ ..ကြုံတွေ့ခဲ့ရင်ဆိုတဲ့ အတွေးနဲ့အခြေအနေပျက်သွားတာကို ရည်ညွှန်းပြောဆိုကြတာပါ..။

ထိုင်နေလျှင် အကောင်းသား ထသွားမှ ကျိုးမှန်းသိကြတော့..နည်းနည်းကွာပါတယ်..။ ဆိုလိုတာက ထိုင်နေတုန်းက ကိုယ်ကျိုးတာကို သူများတွေကမသိပါဘူး..။ထလိုက်တော့မှ မသန်မစွမ်းကျိုးကန်းနေတာကို လူတွေသိကုန်တဲ့သဘောမျိုးပါ..။တနေရာကနေ တနေရာကို ကူးပြောင်းတဲ့ ကာလမှာ ကိုယ့်မှာ ရှိပြီးသားအားနည်းချက်ကို မပြုပြင်နိုင်ပဲ..အဆင်မပြေဖြစ်နေတာ မျိုးကိုပြောတာလို့ယူဆမိပါတယ်..။

နှစ်ခုစလုံးက အနည်းငယ်ကွဲပြားနေသလိုထင်ရပါတယ်..။ဘာပဲဖြစ်ဖြစ် တည်ငြိမ်တဲ့ အခြေအနေတစ်ခုတော့ ပျက်ယွင်းသွားတာပါပဲ..။ဒါပေမယ့်လည်း ကျွန်တော်က ထိုင်နေဖို့ ထမသွားဖို့ အားပေးတာမျိုးမဟုတ်ပါဘူး..။ မဖြစ်မနေထိုင်နေရတဲ့ ကျွန်တော့်ခေါင်းထဲမှာကော် ဘယ်လိုအတွေးတွေရှိမလဲ..။(အစီအစဉ်မကျပဲ ကဘောက်တိကဘောက်ချာ...အတွေးတွေ ထွက်ကျလာပါတော့တယ်)

ကျွန်တော်တို့ လူသားအားလုံး ထိုင်ခြင်းပုဒ်နဲ့ မကင်းကြပါဘူး..။သက်တောင့်သက်သာ အနေအထားမျိုးအတွက် ထိုင်ခြင်းက အသင့်တော်ဆုံးပါပဲ..။ ဒါပေမယ့် အခါများစွာ...ကျွန်တော်တို့တွေက ကိုယ့်ဘာသာ ကိုယ် ဒုက္ခ ကိုယ်ရှာသလို..ထိုင်နေရင်းဖြစ်သွားတတ်ကြပါတယ်..။ ထိုင်နေပေမယ့်လည်း..အထိုင်မတတ်ရင် ပြဿနာရှိပါတယ်..။ အနေအထိုင်မတတ်ဘူး ၊ နေတတ်ထိုင်တတ်တယ် ဆိုတဲ့ စကားလုံးတွေနဲ့ ဗမာလူမျိုးတွေ ရင်းနှီးကြပါတယ်..။ဒီစကား ဘယ်လောက်အထိတာသွားတယ်ဆိုတာ ကြုံဖူးသူတိုင်းသိပါလိမ့်မယ်..။

ကျွန်တော်ကတော့ နေတိုင်းကြုံနေရတာပါ..။ ပုံမှန်ဆို ကျွန်တော်က အလှုပ်သမား..။ငြိမ်ငြိမ်လေး တစ်နေရာရာမှာ ထိုင်နေဖို့ဆိုတာ စိတ်ကူးတောင်မျှ မယဉ်ခဲ့ဖူးပါဘူး..။ဒါပေမယ့်ဗျာ...ခက်တာက ကျွန်တော်လုပ်ရတဲ့ အလုပ်က ငြိမ်သမျှမကပဲ ..ကုတ်ပါနေရပါတယ်ဆိုသလိုဖြစ်လောက်အောင်ကို တနေကုန်တနေခန်း ငုတ်တုတ်လုပ်ရတဲ့အလုပ်...။ကဲ..အဲ့တော့ မခက်လား...။ ဒါပေမယ့်..ဂနာမငြိမ်တဲ့သူတွေရဲ့ အကျင့်အတိုင်း လူတော့ မလှုပ်ရရင်နေ....စိတ်ကိုတော့လှုပ်မယ်ဆိုတော့ အကြံနဲ့... တစ်နေ့တစ်နေ့ အွန်လိုင်းတက်...ဟိုလူ့ ပေါက်ကရလုပ်..ဒီလူ့ ချောက်တွန်း..ပြဿနာမရှိ ပြဿနာရှာ...စသဖြင့် စိတ်အလုပ်များ..မနားမနေဖြစ်ရမယ့် ကိစ္စပေါင်းစုံကို တီထွင်ကြံဆ လှုပ်ရှားပါတော့လေသည်..။ ဒါကြောင့် တနေ့တနေ့ ရှင်းလိုက်ရသည်..ဖြစ်ခြင်း...ဟိုလူက ဟိုဟာဖြစ်လို့..ဒီလူ့က ဒီဟာဖြစ်သည်နှင့်...မနေတတ်မထိုင်တတ်သူတို့ ၏ ထုံးစံအတိုင်း အရည်မရ အဖတ်မရတွေနဲ့ အချိန်ကုန်..လူပန်း..နောက်ဆုံးတော့ ခေါင်းရှုပ်တာပဲ..အဖတ်တင်ပါတယ်..။ အွန်လိုင်းဆိုတာကလည်း လူပေါင်းစုံတို့ ၏ စတည်းချရာ..၊ ပျော်မွေ့ရာ..၊နားခိုရာ ဖြစ်လာတဲ့ ယနေ့လို အချိန်အခါမျိုးမှာ...သူတို့ တွေရဲ့ ထင်မြင်ချက်..၊ယူဆချက်..၊ မှတ်ချက်..၊ ဆွေးနွေးချက်တွေကလည်း မနည်းမနော...။

အားလုံးအတွက် အစဉ်ပြေမယ့် နည်းလမ်းတစ်ခုကို အကြိမ်ပေါင်းများစွာ...စဉ်းစားတွေးခေါ်ရူးသွပ်ကြည့်ဖူးပါ၏.။ မည်သို့မျှ ဖြစ်နိုင်စရာအကြောင်း မရှိ..။အချို့က ငြိမ်းချမ်းချင်ကြသည်..။အချို့က ရန်လိုကြသည်..။အချို့က စကားများသည်..၊ပျော်တတ်သည်..။တချို့က စကားနည်းသည်..၊ အားနေ ထိုင်ပြီး စိတ်ညစ်နေတတ်သည်..။အားငယ်တတ်သူ..၊မောက်မာတတ်သူ..၊ပွင့်လင်းသူ..၊ လိမ်နေရမှ ကျေနပ်သူ.၊ကြွားဝါတတ်သူ..၊လျှိုတတ်သူ..၊ စပ်စုတတ်သူ..စသော..လူအမျိုးမျိုး..တို့၏ စိတ်နေသဘောထား ပြယုဂ်တွေကလည်း... အပြိုင်အဆိုင်..။တကယ့် လောက အစစ်လောက်နီးပါး..ဖြေရှင်းစရာ..ပြဿနာတွေက ပေါ်လွန်းလှသည်..။

ဘယ်သူ့မှ ဒါဟာ တကယ်မဟုတ်...ငါနဲ့ လားလားများ မဆိုင်းဟု..သဘောထားနိုင်သူ ရှားပါးလှသည်..။ လူတိုင်းနီးပါး ဒါကို တကယ့်အပြင်လောက နှင့် ထပ်တူထပ်မျှ ခံစား နိုင်စွမ်းရှိကြသည်..။ ပြဿနာကလည်း ..ရှာချင်ရင် ရှာသလောက်ရနိုင်သလို...ဖြေရှင်းချင်ကြသည့် လူတွေကလည်း ပေါမှပေါ..။
ငါသိ..ငါတတ်...ငါမှ မှန်တွေချည်းပဲ...။ဒီလို လူတွေနဲ့ နိစ္စဓူဝ ဆက်ဆံနေရသော ကျွန်တော်ပင် တော်တော်လေးကို တော်လာပြီဖြစ်သည်..။ ယခင်က လုံးဝမသိသော ကိစ္စများကို မသိဘူးဟု ဒုံးတိဖြေရာမှ..ယခုဆိုလျှင်..ငါသိထားတဲ့ အတိုင်းပြောရရင်..ဟု အစချီတက်နေလေပြီ..။ပေါကြွယ်ဝ လိုက်သည့် ပညာရပ်တွေ....စာတွေ့ ၊ရုပ်တွေ့ ၊သဘာတွေ့ ..၊အာတွေ့ စုံလွန်းလှသည်..။

ထိုင်နေရင်းနဲ့ ရတဲ့ အသိတရား ..အတွေ့အကြုံတွေက ..ထသွားပြီး သင်ယူစရာမလိုလောက်အောင်ကို ခေတ်ကြီးက မြန်ဆန်တိုးတက်နေပြီ..။အင်တာနက် ခေတ်ကြီးကိုး...။
ဒါကြောင့် သူငယ်ချင်းတို့ကို အွန်လိုင်းလောက ကနေ ကြိုဆိုပါတယ်...။ ထိုင်နေတာခြင်း အတူတူ အကျိုးများစေမယ့် နည်းလမ်းတွေ ဖြစ်တဲ့...ချက်တင်ထိုင်ခြင်း... လေပန်းခြင်း...comment ရေးခြင်း..ဂိမ်းဆော့ခြင်းများ အပြင်..အခုနောက်ထပ် ကောလဟာလ လွှင့်ခြင်း ဆိုတဲ့ ပေါ်ပြူလာ အဖြစ်ဆုံးနည်းလမ်းကိုပါ...ထပ်မံစမ်းသပ်နိုင်ပါကြောင်း အကြံပြုပါရစေ...။

ထိုင်နေရင်းနဲ့... အခြားသူများ၏ ကိစ္စကို ၀င်ရောက်စွက်ဖက်ခြင်း၊သမီးရည်းစား အချင်းချင်း အစဉ်မပြေအောင် ဂုံးတိုက်ခြင်း၊ အခြားသူတို့၏အားနည်းချက်ကိုထောက်ပြခြင်း..၊အားသာချက်ကို မသိချင်ယောင်ဆောင်ခြင်း၊လိုအပ်ရင်လိုအပ်သလို..အတင်းပြောခြင်း..၊အယူဝါဒအသစ်ထူထောင်ခြင်း.၊ခြောက်လှန့်ခြင်းများဖြင့် အကုသိုလ်ယူနိုင်ပါကြောင်း....

ဒီကိစ္စတွေအားလုံးက သာမန်ပါပဲ..။သာမန်လှုပ်ရှားသွားလှုပ်ရှားသွားလာနေတဲ့..သာမန်လူတွေရဲ့ အမူအကျင့်တွေပါပဲ..။ကျွန်တော်မှာလဲ ဒီလိုအကျင့်တွေ ရှိပါတယ်..။ဒီလို အကျင့်တွေနဲ့ နေသားကျနေတဲ့ သာမန်လူတစ်ယောက်ပါပဲ..။ဒီလိုသာမန်လူတွေကြားထဲ..သာမန်ထိုင်နေခြင်းဖြင့်......ကျွန်တော်ထိုင်နေသည်..။

ဘာကြောင့်လဲဆိုတော့ ကျွန်တော်က ထိုင်နေရတာကိုတဖြေးဖြေး ချစ်တတ်လာလို့ ဖြစ်သည်..၊
တနေ့တခြား ဘော်ဒီဝိတ်တက်လာသော ကျွန်တော့်အဖို့ ထိုင်နေခြင်းလောက် ကောင်းတာမရှိ..။ အသက်အရွယ်ကလည်း ထောက်လာပြီဖြစ်သည့်အတွက်..အရင်လို့ ခဏခဏ ထလိုက်ထိုင်မကောင်းတော့..။
ဒါကြောင့်ကျွန်တော် အမြဲထိုင်နေကြ ထိုင်ခုံလေးကို သူများ တကာရသွားမှာစိုးရိမ်သည်..။
ထို့ကြောင့် ကျွန်တော့်ထိုင်ခုံလေးကို အကြောင်းကြောင်းကြောင့်ရသွားနိုင်သူတွေကို..ကျွန်တော် မျက်စောင်းထိုးမည်..။ စောင်းချိတ်မည်..။ငေါ့မည်..။
ကျွန်တော်ကိုတိုက်ခိုက်လာလျှင်..လက်တုံပြန်ဖို့ အသင့်ပြင်မည်..။မနိုင်လျှင်စကားစစ်ထိုးဖို့ ကျွန်တော်စာတွေ အများကြီးဖတ်မည်..။ထိုင်နေရင်းနှင့်ပင်..ကျွန်တော် ကြံ့ခိုင်ဖို့ကြိုးစားမည်..။ကျွန်တော့် အတ္တအတွက် နေရာကောင်းကောင်းတခုလိုသည်..။သက်တောင့်သက်သာလေးပေါ့ဗျာ..။ အခုထိကျွန်တော် ထိုင်နေခွင့်ရတုန်းပါ...။ဒီလို ထိုင်နေခွင့်ရဖို့ကိုလည်း ကျွန်တော်ကြိုးစားဦးမှာပါ...။

ပထဆုံးပြောခဲ့တဲ့ အချက်နှစ်ချက်က ကျွန်တော့်အတွက် နှစ်ခုလုံး အကျုံးဝင်ပါတယ်..။ကျွန်တော်မသေချင်သေးလို့ တောမပြောင်းပါဘူး...။ခေတ်က စိတ်မချရလောက်အာင် အရမ်းကို အပြောင်းအလဲမြန်ပါတယ်..။နောက်တစ်ခုက ကျွန်တော်ကျိုးတာကို..လူတွေသိမှာ အရမ်းစိုးပါတယ်..။ကျွန်တော်က အဲဗားကျိုးပါတယ်..။ အကြောင်းအမျိုးမျိုးနဲ့ပေါ့..။တစ်ခါတစ်လေ..ဇက်ပါကျိုးနေတတ်ပါတယ်...။အားနည်းချက်တွေက လည်း တပုံတပင်မို့...စိတ်ဓါတ်ကလည်း ကျိုးနေပါသေးတယ်..။

ကျွန်တော်ခုထိ သာမန်ထိုင်နေတုန်းပါ.....။                     ။

(ကွန်ပြူတာရှေ့အဲဗားထိုင်နေရတာကို...ပျင်းလာလို့)
ဘီလီ ... (၁၅.၆.၂၀၁၁)

No comments:

Post a Comment