Tuesday, January 8, 2013

ကျွန်တော်နဲ့ ဖေ့ဘုတ်


Facebook ကို ဒီဘက်ခေတ် အင်တာနက်သုံးစွဲတဲ့သူ (အထူးသဖြင့်) ဆယ်ကျော်သက်တွေ သိပြီးသားပါ။အထူးရှင်းပြစရာမလိုပါဘူး..။ နာမည်ကြီးလွန်းလို့ ရုပ်ရှင် ရိုက်တာ..လူကြိုက်များခဲ့တဲ့အပြင်..၊ အော်စကာဆု စကာတင်မှာစာရင်းဝင် တဲ့ အထိ အောင်မြင်မှုရခဲ့ပါတယ်..။ကမ္ဘာပေါ်မှာ ဖေ့ဘုတ်သုံးစွဲတဲ့လူဦးရေသန်းပေါင်း (၅၀၀) တောင်ရှိသတဲ့..။ ကမ္ဘာ လူဦးရေ အချိုးနဲ့ ၁၁း၁ လောက်ရှိပါတယ်..။

လူတွေ ဘာကြောင့် Facebook ကို ဒီလောက် နှစ်သက်သလဲ ကျွန်တော်တို့ စဉ်းစားကြည့်ရအောင်..။ Facebook  ဆိုတဲ့ လူမှုရေး ကွန်ယက် တစ်ခု ဖြစ်တည်လာပုံ သက်ဝင်လာ ပုံအကြောင်းကို Social Network ဆိုတဲ့ရုပ်ရှင်ကားကို ကြည့်ဖူးသူတိုင်းသိကြပါလိမ့်မယ်..။ ဟိုးယခင် ကတည်းက လူမှုရေး ကွန်ယက် တော်တော်များများ..အင်တာနက်ပေါ်မှာ ရှိပြီးသားပါ..။ Facebook နဲ့ ယှဉ်လိုက်ရင် သက်တမ်းရင့်ပြီးသား နောင်တော် လူမှုရေး ကွန်ယက်တွေ အင်တာနက်ပေါ်မှာ လူကြိုက်များနေတုန်း...။ Friendster , Zorpia , Hi5 , Net-log , Person ( web-chat ) အစရှိတဲ့ website တွေကို လူသိများပါတယ်..။ ကွာခြားချက်တစ်ခုက Facebook က စတင်ပေါ်ပေါက် စဉ်ကတည်းက အရမ်းရိုးရှင်းပါတယ်..။

ကျွန်တော်တို့ စတင် အသုံးပြုစဉ် ၂၀၀၇ တုန်းက အရမ်းကို ပျင်းစရာကောင်းတဲ့ Network တစ်ခုသာထင်မိခဲ့ပါတယ်..။ သူရဲ့ အသုံးပြုပုံက အရမ်းကို လွယ်ပါတယ်...။ background ကို လည်း သူ သတ်မှတ်ထားတဲ့ standard frame နဲ့သာ သုံးလို့ရပါတယ်..။အဲ့ဒီတုန်းက အခုလို App တွေကို ဖောဖောသီသီ မသုံးနိုင်သေးတာကြောင့် စိတ်ဝင်စားစရာ မကောင်းလှပါဘူး..။ နောက်ပြီး ..web page အတွက် playback song တွေကို လည်း upload လုပ်လို့မရပါဘူး..။ ကျွန်တော်လို ကိုယ် web page ကို အချိန်တိုင်း သ နေတဲ့ လူတစ်ယောက်အတွက်တော့ စိတ်ဝင်စားစရာမကောင်းလှပါဘူး..။ ဘယ်နေရာကို ကြည့်ကြည့် အဖြုရောင်နဲ့ အပြာရင့်ရင့် အရောင်ပဲမြင်နေရတာက ..မျက်စိပသာဒ လည်း မဖြစ်လှပါဘူး..။

Facebook account ကို ၂၀၀၇ ခုနှစ်ကတည်းကလုပ်ထားပေမယ့်..ကျွန်တော် တကယ်တမ်း သေသေချာချာသုံးဖြစ်တာက ၂၀၀၉ မှပါ..။ ထူးခြားချက်တစ်ခုက သူ့မှာ ပါလာတဲ့ feature  တခုက Wall ဆိုတာပါပဲ…..။ ကျွန်တော်နားလည် သလောက်ကတော့... ကိုယ့်နဲ့ ချိတ်ဆက်ထားတဲ့ သူငယ်ချင်းအားလုံးရဲ့ update information တွေကို အချိန်နဲ့ တစ်ပြေးညီ အသိပေးတဲ့ စနစ်တခုလို ထင်ပါတယ်..။ ဒါဟာ Facebook ရဲ့ အားသာချက်တွေထဲ့ က တစ်ခုပါပဲ..။ ဘယ် Network မှာမှ မရှိသေးတဲ့ (ရှိကောင်းလဲရှိပါလိမ့်မယ်) စနစ်တခုပါပဲ...။ အချိန်ကို အလုအယက် သုံးစွဲနေရတဲ့ ဒီနေ့လိုခေတ်ကြီးမှာ လူတိုင်းရဲ့ webpage တစ်ခုချင်းဆီကိုလိုက်ကြည့်ဖို့ ဆိုတာမလွယ်လှပါဘူး..။ဒါကို Facebook က အကွက်ကျကျ ဖြေရှင်းပေးလိုက်တာပါ...။အဲ့ဒီစနစ်ကိုအခုချိန်မှာ Social Network အတော်များများက လေ့လာအတုယူနေရပါပြီ..။

နောက်တစ်ခုက သူရဲ့ frame ပါ..။သူ့ကွန်ယက်ထဲကို ၀င်လိုက်တာနဲ့ ဘယ်နေရာကိုပဲ click နှိပ်နှိပ် မိုးပြာရောင် ရင့်ရင့် ကိုပဲမြင်နေရတာက စိတ်ကိုငြိမ်းချမ်းမှုနဲ့ အတူ လူတိုင်းဟာ ငါနဲ့ တသားတည်းပါလာဆိုတဲ့ အထင်ကို ရောက်စေပါတယ်..။ ( personal profile page မှာတော့ design လှလှလေးတွေ ပြောင်းပေးနိုင်တဲ့ App တွေရှိပါတယ်..။ တစ်ခြားသူတွေတော့ မြင်နိုင်မှာ မဟုတ်ပါ) ဒါဟာ
လူတိုင်းလူတိုင်းမှာ .. ရရှိတဲ့ အခွင့်အရေးကို သတ်မှတ်ထားတဲ့ ဘောင်တစ်ခုတည်းမှာ စနစ်တကျ လုပ်ဆောင်သင့်တယ် ဆိုတဲ့ အမြင်ကိုထင်သာစေပါတယ်..။

ဒီအချက်နှစ်ချက်က Facebook ကို ကမ္ဘာပေါ်မှာ လူကြိုက် အများဆုံးဖြစ်စေတာလို့ထင်ပါတယ်..။လူတွေက သာတူညီမျှမှုနဲ့ ... စနစ်ကျတာကို လူတိုင်းကြိုက်ပါတယ်..။အနည်းဆုံး ကိုယ်မလုပ်နိုင်ရင်တောင်မှပဲ လုပ်နိုင်တဲ့သူတွေကိုတော့ အားကျလေးစားကြတာပါပဲ...။

 ဒါပေမယ့်လည်း ဘယ်အရာမှ ပြည့်စုံတယ်ရယ် မရှိတာ လောက သဘာဝပဲမို့...Facebook မှာလည်း ချို့ယွင်းချက်အချို့ရှိပါတယ်..။ Facebook က ဂိမ်းတွေကို လူကြိုက်များတာ လူတိုင်းအသိပါ..။ တကယ်လည်း ကြိုက်ချင်စရာကောင်းလောက်အောင်...ဂိမ်းတွေက ဆွဲဆောင်မှုရှိလှပါတယ်..။ Fame Villa ,City Villa, Mafia War, It Gal , စသဖြင့်ဂိမ်းမျိုးစုံလှပါတယ်..။ အချို့ ဂိမ်းတွေဆိုရင် Credit ပေးပြီးဆော့ရတဲ့အထိ လူကြိုက်များလှပါတယ်..။ ဒါကတော့ ကိုယ်ကြိုက်ရင့် ဆော့ မကြိုက်ရင်ဆော့ ဆိုပေမယ့် ...အလွယ်တကူဆော့နိုင်အောင် စီစဉ်ပေးထားတာကို သိပ်သဘောမတွေ့လှပါဘူး..။လူဆိုတာ က အလကားရရင် အချိန်ဘယ်လောက်ကုန်ကုန်...စိတ်အပန်းဖြေဆိုပြီး ခေါင်းစဉ်တပ်ရင်း နစ်မျောသွားတတ်တာမျိုးကိုး...။

ဂ်ိမ်းဆိုတာက အပန်းဖြေဖို့ရယ်...သက်သက်ပါ..။ဟိုတုန်းကတော့ ကလေးအများစုအတွက်ရည်ရွယ်ပြီးထုတ်လုပ်ခဲ့တဲ့ ဂိမ်းဟာ အခုတော့ လူကြီးတွေပါနှစ်နှစ်ခြိုက်ခြိုက် ကစားနေကြပါပြီ..။ ခက်တာက Facebook က ဂိမ်းအတော်များများဟာ...ကလေးတစ်ယောက် အနေနဲ့ တော့ဆော့ဖို့ အမှန်တကယ်မလွယ်ကူလှပါဘူး..။ နောက်ကစားသူရဲ့  Clone အဖြစ်ဝင်ရောက်လှုပ်ရှားနေတဲ့ Virtual Character ...အတွက် အချိန်ပေးရပါတယ်..။တဖြည်းဖြည်းနဲ့ အချိန်ကုန်မှန်မသိကုန် နေတဲ့အဖြစ်ပါ...။ဂိမ်းထဲက အလုပ်တွေကို နေ့စဉ် မှန်မှန် ဆောင်ရွက်နေပေမယ့်..တကယ့်အပြင်မှာ တာဝန်ဝတ္တရား ပျက်ကွက်နေတဲ့သူတွေ တပုံတပင်..။ ..ဒီအချက်ကို ကျွန်တော်မကြိုက်ပါဘူး..။ဒါကလည်း ကျွန်တော့် ရဲ့ ထင်မြင်တွေးတောချက်သက်သက်မျှသာဖြစ်ပါတယ်..။

နောက်တစ်ခုက App တွေ တော်တော်များများကို တစ်နေရာထဲမှာ စုစုစဉ်းစဉ်းရနိုင်တာဟာ... လူတစ်ယောက်ရဲ့ ကိုယ်ပိုင် Creation ကို ဖန်တီးရာမှာ အားနည်းစေတယ်လို့ထင်ပါတယ်..။အလွယ်တကူရတဲ့ အတုတွေ တွေကို အစစ်လို့ ထင်သွားမှာ စိုးရိမ်ပါတယ်..။နောက်...Facebook က Screen Time အရမ်းပေးရပါတယ်..။ အချိန်အရမ်းကုန်ပါတယ်..။ App တစ်ခုချင်းစီးတိုင်းကို create လုပ်ဖို့ အချိန်ပေးရပါတယ်..။ ကိုယ်ကိုယ်တိုင် ပါဝင်ခွင့်ရတဲ့ အတွက် အရမ်းပျော်စရာကောင်းပါတယ်..။ ဒါပေမယ့် ပေါ့လေ....
ဒါဟာ ... Virtual Life တစ်ခု မှာ သာယာတာပဲဖြစ်ပါလိမ့်မယ်..။ဘာမှ အကျိုးများစရာအကြောင်းမရှိပါဘူး...။ဒါလည်းပဲ ထင်မြင်ယူဆချက်သက်သက်ပါ..။

ကဲဗျာ... ဒါက Facebook အကြောင်း ကျွန်တော်သိသလောက် အကျဉ်းချုပ်နဲ့ ထင်မြင်ချက်တွေပေါ့..။ဒါပေမယ့် ကျွန်တော် ပြောချင်တာက ကျွန်တော်နဲ့ Facebook နဲ့ ပတ်သတ်မှုပါ..။Facebook ကို ၂၀၀၉ ခုနှစ် မှ ကောင်းကောင်းစသုံးဖြစ်တဲ့ ကျွန်တော် မှာ online friend ရှားပါးလှပါတယ်..။ ကျွန်တော်ဘာကြောင့် Facebook သုံးဖြစ်သလဲဆိုရင်...အဖြေကရှင်းပါတယ်.။ ကောင်မလေး လှလှလေးပုံတွေကြည့်မယ်..။နောက် အဆင်ပြေရင် Date မယ်..။ ဒီလောက်ပါပဲ..။

ကျွမ်းကျွမ်းကျင်ကျင်နဲ့ သုံးရတာ အဆင်ပြေတဲ့ အခါမှာ... ကျွန်တော် ရည်းစားတဖြစ်လဲ ..ကျွန်တော် သူငယ်ချင်းမလေးကို သုံးကြည့်ပါလားလို့ အကြံပေးမိတာပေါ့..။ သူမသိသေးတာ ကိုယ်ကသိရင် ကိုယ်ကိုများ အထင်ကြီးမလားပေါ့..။ တကယ်လည်း အထင်ကြီးခဲ့ပါတယ်..။ ကျွန်တော်ပဲ သူ့အကောင့် တစ်ခုလုံးကို Create လုပ်ပေး..နောက် ပုံလှလှလေးတွေတင်ပေး ...ဂိမ်းဆော့ပေး..ပေါ့..။ သာယာနေတာ..။ chat box ဆိုတာ ပေါ်လာတော့မှ ကွိုင်ကစတက်တော့တာပဲ..။comment ရေးတာလောက်မှာ သည်းခံနိုင်တယ်..ယောက်ျားလေး သဘာဝကို..နားလည်တယ်..အဆင်ပြေတယ်ဆိုပေမယ့်.. chat box မှာ အမျိုးမျိုးသော ယောက်ျားထု၏ ကြိုးပမ်းအားထုတ်မှုကို ကျွန်တော့် ရည်းစားလေး ခမျာ ကြံကြံခံနိုင်ဟန်မတူပါဘူး..။အားသာချက်တွေ ဖြစ်တဲ့ ဓါတ်ပုံလှလှတွေကို တ၀ကြီးကြည့်ပြီးမှ နီးစပ်ဖို့အားထုတ်ခြင်းအလို့ငှာကြောင့်... သူ့အကောင့်ကို တောင် ကျွန်တော့်ကို မပေးသုံးတော့ပါဘူး..။ privacy ကို မစပ်စုပါနဲ့ ဆိုတဲ့ အကြောင်းပြချက်နဲ့ပေါ့ဗျာ..။ နောက် မကြာပါဘူး... ကိုရီးယား စတိုင်...ခေါင်းက ဆံပင် အချွန်အတက်တွေနဲ့ ကောင်လေးတစ်ယောက်နဲ့ လူငယ်ချင်း မေတ္တာမျှကြလေသတဲ့..။

အဲ့ဒီမှာတင် ကျွန်တော်လည်း ပေါက်ကွဲ အော်ဟစ်..ငိုကြီးချက်မ..မြည်တွန်းတောက်တီး..ညီးတွား..စိတ်မကောင်း..ဒေါသထွက်..ယူကြုံးမရ..ကြေကွဲ.. မေတ္တာငတ်..အစုံခံစားရတာပေါ့ဗျာ..။အမှန်က သူ့ဘာသာနေတာကို ကိုယ်က သွားစပ်ဆော့မိတာကိုး..။မတတ်နိုင်ဘူးဗျာ..။ဒါပေမယ့် ကိုယ်အတတ်နဲ့ ကိုယ်စူးတာဆိုတော့..သူများကို ရင်ဖွင့်ရမှာလဲ ရှက်ပါရဲ့..။ ဒါကြောင့် ခံစားရသမျှတွေကို စာတွေချရေးချရေးရင်နဲ့ ...ကိုယ်ခံစားရတာတွေကို သူများတွေကို သိအောင် ဖော်ထုတ်ချင်လာတယ်..။ကိုယ့်ကိုယ်မျှဝေ ခံစားပေးမယ့် သူတွေကို လိုချင်လာတယ်..။ စဉ်းစားရင်း...နဲ့ Facebook က Note ရေးတဲ့ နေရာကို သတိရပြီး..ကျွန်တော်ဖတ်စေချင်တဲ့သူ (၀ါ) ကျွန်တော်ကြောင်ချင်တဲ့ သူတွေကို ပေးဖတ်တော့တာပဲ..။အဲ့ဒီကစလို့ note ရေးတဲ့ ၀ါသနာနဲ့... tag လုပ်တဲ့ ၀ါသနာဟာ ဒွန်တွဲလို့ ဖျောက်မရတော့ပါဘူး..။

Facebook သည် ကျွန်တော်၏ ရင်ဖွင့်ရာ ရပ်ဝန်း.....ကျွန်တော်ခံစားရသမျှတို့၏ တံခါးပေါက်..ကျွန်တော်အနုပညာတို့၏ ပြပွဲ...ဒါကြောင့် ကျွန်တော် Facebook ကိုချစ်သည်..။ Facebook ထဲက ဘော်ဒါတွေကိုချစ်သည်..။ချစ်စရာမှန်သမျှ အကုန်ချစ်သည်..။အခုလည်း ချစ်သည်..နောင်လည်းချစ်သည်..။ အချစ်ကို အလိုရှိသည်..။အချစ်ကို တအားချစ်သည်... ^^ Facebook ကိုပြောတာ....

(၀န်ခံချက်..။ ။ ကျွန်တော်ရေးချင်ရာ လျှောက်ရေးထားတာပါ..။ ဘယ်သူ့အာဘော်မှ မပါပါဘူး...)



ဘီလီ ( ၉.၅.၂၀၁၁) ၁၂း၃၅


No comments:

Post a Comment

Post a Comment